Allgemein

Stafetta da prümavaira a Sent

Als 11 d’avrigl ha gnü lö a Sent la stafetta da prümavaira culs uffants da scoulina fin 9avla classa. Las scolaras e’ls scolars han gnü d’absolver quel di ün traget cun 4 disciplinas in 16 gruppas. Il traget as rechattaiva a Flüs e las disciplinas d’eiran „ir cul velo“, „ir cul scooter“, „biatlon“ e „siglir culs sachs“. Las gruppas d’eiran masdadas cun uffants pitschens e gronds e mincha gruppa pudaiva decider svess chi chi fa che traget. L’avantmezdi han las scolaras e’ls scolars dal s-chalin ot insembel culla magistraglia miss ad ir il parcuors e tuots han pudü far duos girs da prouva. Davomezdi ha lura gnü lö la concurrenza, pro quella nu giaiva in prüma lingia per guadagnar o perder, dimpersè pel plaschair vi da’s movantar, per esser our i’l liber ed avair plaschair da la cumpagnia e dals duels. Quia seguan ün pêr impreschiuns da quel di.