Virus da corona

Il virus da Corona occupa a tuot la populaziun fingià dürant ün bun temp. Illas medias gnina infuormats di per di davart nouvs cas illa China e sül rest dal muond, ma impustüt eir davart ils prüms cas in Svizra. La scoula es fingià daspö ün pêr dis in contact cul chantun e vain infuormada permanentamaing davart la situaziun actuala. Fin her esa gnü cusglià da’s cuntgnair sco pro üna grippa stagiunala e da nu preverer ulteriuras masüras.

Davo chi sun gnüts cuntschaints ils prüms cas infectats cul virus i’l chantun Grischun, ha la Regenza grischuna decis cha occurrenzas publicas da caracter surregiunal sun scumandadas eir in Engiadina Bassa. Illa situaziun dal Chalandamarz ha surdat il chantun la respunsabiltà da decider als cumüns, ha però trat attent cha eir pro’l Chalandamarz saja dad esser fich precaut schi’s partecipeschan turists da differents lös dal muond e cusglià da clomar giò il Chalandamarz in cas da dubis.

In Engiadin’Ota han il capos cumünals decis fingià in gövgia, ils 27 da favrer 2020 chi nun haja lö ningün Chalandamarz quist on. Ils capos cumünals da l’Engiadina Bassa s’han radunats in venderdi, ils 28 da favrer 2020 ad üna sezzüda sül Ospidal d’Engiadina Bassa ed han trat la decisiun cha’l Chalandamarz gnia annulà in tuot l’Engiadina Bassa. La decisiun nun es statta simpla. Tuot chi s’es consciaint da la valur da quist’üsanza e’l maniamaint da la populaziun in chosa es fich different. La sandà da la populaziun ha però in mincha cas priorità ed uschè ha stuvü gnir tratta üna decisiun raziunala.

No sperain d’avair l’incletta per quista situaziun e giavüschain a tuot ils uffants bellas vacanzas e buna recreaziun.

Tuot tenor il svilup dal virus da Corona dürant la prosm’eivna esa pussibel chi detta ulteriuras masüras da precauziun. Quellas gnissan garanti comunichadas a temp ütil. No sperain però da pudair cumanzar sco previs in mardi, ils 10 da marz 2020 cull’instrucziun regulara.

No as ingrazchain pella collavuraziun.

Las scoulas dal cumün da Scuol