December – Il mais dal gö da ballarait

Il mais december es a Sent – dasper il mais dal Niculaus, dal Nadal e dal Silvester – il mais dal gö da ballarait. La seguonda fin d’eivna da december as chattan raduond 70 Sentiners a Sent in sala da gimnastica per giovar il turnier tradiziunal da ballarait. Quist on ha lö il turnier pella 38avla jada. A quel turnier as partecipeschan üna gronda part da las scolaras e’ls scolars dal s-chalin ot da Sent, però eir blera giuventüna ed oters amaturs dal gö da ballarait. L’atmosfera in scoula dürant quella fin d’eivna d’Advent es bellischma. Organisà vain il turnier da 2 magisters dal s-chalin ot, l’usteria mainan las scolaras e’ls scolars da la 5 e 6avla classa da Sent.

Il di davo il turnier tradiziunal a Sent haja nom pel s-chalin ot: Turnier da Nadal a Scuol. Il magister da sport da la scoula da Scuol, Berni Gredig, organisescha per tuot ils s-chalins ots da la regiun ün turnier da ballarait per scolaras e scolars. Quel ha lö quist on als 11 da december (davomezdi) illa sala da gimnastica da la scoula da Scuol. Quia as masüran las scolaras e’ls scolars da Martina fin Guarda giovond il gö da ballarait. Quai es adüna üna bun’occasiun pellas scolaras, pels scolars e pella magistraglia da las singulas scoulas per s’imprender a cugnuoscher.

In quel sen as giavüscha ün paschaivel temp d’Advent e bun divertimaint cul gö da ballarait.

Gian Caviezel, mainascoula Sent