muonds da sömmi

GIULIA: Meis muond da sömmi ha nom BRZD. Il plü special vi da meis muond es chi’s po far „bungee jumping“ giò da chasa. Las vias da meis muond da sömmi sun our da dutscharias e la bos-cha our da vatta da zücher. In meis muond daja üna chasa, duos lais, bos-cha, dutscharias e cafè chi vain giò da tschêl. E sch’inchün less gnir pro ha’l da sclingiar e lura vain giò üna s-chala. Quai es meis muond da sömmi.
Eu n’ha decis da crear meis muond uschè pervi ch’eu n’ha jent dutscharias e pervi ch’eu laiva fingià adüna far „bungee jumping“.
SVENJA: Meis muond da sömmi ha nom AIRESLI. In meis muond da sömmi daja ün rispli. Schi s’ha in man quel ed i’s stübgia vi dad alch, lura crouda quella roba giò da tschêl. I’s po però giavüschar alch be trais jadas l’eivna.
In meis muond da sömmi nu daja vias da beton dimpersè „airtracks“, autos nu daja eir ingüns. I dà be asens. La scoula es our da piziouter ed i’s scriva cun glasura. Tuot las chasas sun our da „bubbles“. Quai es sumgliaint a balluns ma plü lom. Ils bös-chs sun gronds e tuots sun verds. Ils umans sun tuots charischems ed ingün nun es pover. Tuot ils lets sun our da mataratschas dad aua. Ils lais sun adüna là ingio chi’s less. Las muntognas sun tuottas our da tuortas e la naiv es our da glasura. Giò dal tschêl plouva dutscharias.
Eu n’ha creà meis muond da sömmi uschè pervi ch’eu n’ha jent dutscharias e bes-chas, „airtracks“, bös-chs e tuot il rest chi dà in meis muond da sömmi.
SIENNA: Il muond ch’eu n’ha creà vain suvent nomnà „Tolkines“ quai tenor l’autur J.R.R Tolken. Minchatant vain il muond eir nomnà „Arda“.
Il special vi da meis muond: agliunas immensas, „Elben“, „Trols“, „Ends“, „Balrocs“, „Istari“, suls chastels, enorm imposants reginoms, bellischmas cuntradas, enormas construcziuns sur terra, suot terra, sün bös-chs eui. Lura daja creatüras chi nu’s riva da’s metter avant. Eu pudess quintar inavant amo uras. Per dir cuort possa declerar uschè: Meis muond es gnü creà tenor l’univers da Tolkines. Quai vögl dir tenor il muond da „Silmarilion“, „Der Hobbit“ e „Herr der Ringe“. Quai nu sun simplamaing be cudeschs o istorgias. Quai es propcha ün muond; ün muond sco nos cun differentas linguas, culturas, cartas geograficas, legendas, parablas davart la creaziun e tuot quai tocca pro.
Fingià lönch avant co chi s’ha cumanzà a far quint da temp ha „Eru Iluvatar“ (il Dieu) fat nascher (s-chaffi) ad 8 „Valars“. „Valars“ sun suotdieus o i’s pudess bod eir dir anguels. Insembel culs „Valars“ ha „Eru“ s-chaffi il muond (cun chantar). Ün dals „Valars“ s’ha miss cunter tschels ed ha s-chaffi la noschdà. Tschels „Valars“ han creà agliunas gigantas, nanins, ils „Hobbits“, las plantas e las bes-chas, „Ends“ e Huarons“. Ils „Elben“ ed ils umans ha creà „Eru“ (il Dieu) svessa. „Melkor“ il nosch „Valar“ ha transmüdà bunas creatüras in noschas; p.ex. las agliunas in draguns, ils nanins in „Orks“, ils „Ends“ in „Trols“ e „Balrocs“ eui…
Per proteger ils umans e tschels pövels libers da la noschdà han „Eru“ ed ils „Valars“ tramiss a tschinch „Istari“ sülla terra. „Istari“ sun mezdieus chi san striunar. „Melkor“ il nosch „Valar“ ha lura s-chaffi a „Sauron“, quai es eir ün mezdieu. Pervi da quai es „Sauron“ sül listess nivel sco ils „Istari“. Tuot quist es capità e gnü declerà plü precis aint il cudesch „Simarilion“, eir ün cudesch da J.R.R Tolken. I’ls cudeschs da „Der Hobbit“ es ruotta oura la prüma guerra. Eir aint ils cudesch da „Der Herr der Ringe“ daja guerra, il „Ringkrieg“ cunter „Sauron“. La vart buna guadogna la guerra. Il muond ch’eu n’ha creà es quel muond ch’eu n’ha descrit quia survart, simplamaing pür davo tuot las guerras. Là regna pasch sülla „Arda“. Quai chi’s vezza i’l chantun schnester da mia trocla es ün uschedit „Hobbithaus“.
Eu n’ha decis da crear meis muond tenor il muond da J.R.R Tolken pervi cha quel muond am plascha enorm bain. Las cuntradas, ils reginoms imposants, las culturas e las creatüras incrediblas cun qualitats enormas am fascineschan simplamaing.
MICHEL: Meis muond da sömmi ha nom Lambo.
Il plü special da meis muond es chi dà autos da bellezza.
Aint in meis muond da sömmi daja üna garascha ed ün restorant. Quel es bel. I’s vezza üna vacha ed ün auto da posta. La garascha es da la vart dretta dal restorant. La garascha ha nom: Lamborghini. Il restorant ha nom: Ftaner. Tuot il muond funcziuna cun forza solara.
Eu n’ha creà meis muond uschè pervi ch’eu n’ha fich jent autos.
ANNA: Meis muond da sömmi ha nom Chicla. Il special vi da la Chicla es chi dà muntognas da tschiculatta, fluors da uorsins da gomma ed il plü cool es cha las chasas sun süls bös-chs e mincha chasa es colliada almain cun ün’otra chasa cun üna punt. La via es ün trampolin ed invezza d’autos daja chucals. Perquai han ils umans ed ils nanins nas da chucals.
Meis muond da sömmi es ün pa plü pitschen co nos muond normal. I dà però vaira blera roba chi’d es ün pa curiusa. Ün pêr da quellas n’haja fingià manzunà survart.
La scoula da meis muond da sömmi es ün „Donut“ e l’ospidal es üna crusch. Lura daja bavroulas chi vegnan giò da tschêl e schi’s tschütscha landervia schi vain oura ün sirup da buntà! 🙂
Eu n’ha decis da crear meis muond uschè pervi ch’eu n’ha jent dutscharias, la natüra, las bes-chas ed ils umans.
BÉLA: Meis muond da sömmi ha nom SÜPK. In meis muond daja ün Volk ed ingün Volg, ün skatepark ed ün Lai da Padnal cun ün’assa da siglir. Il skatepark es our dad or e las vias sun fattas our da colla. Quai vögl dir: sch’ün auto es sülla via schi tacha quel vi da la colla/via. Lura daja amo ün pool gratuit cun ün’assa da siglir (Lai da Padnal). Il pool glüscha blau. In meis muond da sömmi dorman tuots in üna tenda dad indians.
Eu n’ha creà meis muond uschè perquai ch’el am plascha simplamaing.
CHIARA: Meis muond da sömmi ha nom „Muond da sport“. In meis muond daja be 20 persunas. I dà üna punt da naiv aposta per far passlung, duos bös-chs chi sun colliats cun ün rec, ün bös-ch per rampignar ed ün flüm per nodar. Meis muond es ün muond pitschen. Là daja tschinch differentas disciplinas da sport: nodar, rampignar, passlung, siglir sün trampolins ed üna disciplina da gimnastica d’urdegns, nempe rec. I dà be üna butia sün tuot il muond ed il vendader es ün tschiervi. I dà ün unic cuvel e quel es per las persunas amaladas. Quai es l’ospidal. I dà eir be ün unic meidi e tschinch sours d’amalats.
Eu fetsch fich jent sport e n’ha perquai decis da far ün muond da sport.
ENYA: Meis muond ha nom Iriana. Il plü special vi da meis muond es cha’ls umans san svolar, cha las chasas sun i’l ajer e chi plouva da tuot las culurs. In meis muond es tuot plain natüra ed in nu dà ingüns autos, trens, bus eui…
Ils umans san svolar. Els as pon transmüdar in creatüras chi han alas. I dà plattas in fuorma da föglia, quellas as rechattan eir i’l ajer. sün quellas as poja far la posa.
Eu gnanca nu sa dir precis perche ch’eu n’ha creà uschè meis muond. Quai s’ha simplamaing sviluppà cul temp.
JARNO: Meis muond da sömmi ha nom BO.
In meis muond da sömmi daja üna plazza da ballapè. Lura daja eir ün parc per ir cul velo (süsom a schnestra). Daspera es ün lai. Süsom a dretta es üna chasa. Suot la chasa as rechatta üna pitschna butia. Là as poja mangiar bunas robas (p.ex. Burger da Prui). In meis muond nu daja muntognas ed eir na bos-cha. Quai es il special vi da meis muond.
Eu n’ha creà meis muond uschè pervi ch’eu giouv jent a ballapè, vegn jent cul velo, pervi ch’eu vegn minchatant jent a nodar e perquai ch’eu mang fich jent.
LINA DELIA: Meis muond da sömmi ha nom CAROMONSITANIA. Il special vi da meis muond es chi dà 2 muonds pitschens in 1 muond grond; ün muond es suot terra e tschel muond es sur terra.
In meis muond daja vachas da culur chi müdan culur mincha jada chi’s mundscha ad ellas. I dà ün tschêl da culur, ün local da mundscher, ün local da „chillar“, ün local da gimnastica, chavras, trampolins ed ün vart natürala.
In meis muond as poja far tuot meis hobis ed i dà simplamaing tuot quai ch’eu n’ha jent. Perquai til n’haja creà uschè.
SANDRO: Meis muond da sömmi ha nom WUF WUF.
Quai chi’s vezza in mia trocla es üna chasa da meis muond da sömmi. Aint in üna singula chasa esa üna plazza da hockey, üna stüva, üna stanza da „gaming“, ün McDonalds ed üna pizzaria. I’s po ir dad ün local in tschel e lura as chatta tuot quellas robas. Quai sun tuot robas ch’eu n’ha jent. Perquai n’haja creà meis muond uschè.